सुरेश काँटक के भोजपुरी गीत

कतने भवनवा तुरबs ए बाबा
कतने लोग के मरबs
कतने आवाजवा प मरबs हो ताला
कतने घर उजरबs !

तोहरो बुलडोजरवा ए बाबा
तहरे नाशवा करिहें
हरदम रही ना अन्हरिया ए बाबा
लोगवा दियना बरिहें !

कतने जुलुमिया अइलें ए बाबा
कतने जुलुमी गइलें
कतने लगवलें मुँहकरखी ए बाबा
मुँहवा करिया भइलें !

अबहूँ से अगिया बुतावs ए बाबा
नगरी के बचावs ना
घरवा के जारि जुरि रखिया ना करs
दुश्मन के मत बोलावs ना !

घरवा ई ह सरगवा ए बाबा
झुर झुर बहे बयरिया
किसिम किसिम के सुगंध भरेला
फुलवा खिले रंग हजरिया !

कवल भुतवा सवार तोपे बाबा
कवन देखेलs सपनवा
छोड़ि के जइबs धरतिया ए बाबा
स्थिर करs आपन मनवा !

मानs मोर परथना ए बाबा
मत जियरा तड़पावs हो
एही रे हूके मरेलें कांटक भइया
मत लोगवन के सतावs हो !

             *   *   *